[muriel]

Traduction du Chevalier au lion vers 119-149 en ancien français :

Mais je n'en conterai hui mes,
Se ma dame m'en laisse em pais,
et je li pri qu'ele s'en taise,
que ja chose qui me despaise
ne me commant, soie merchi.
-dame, trestuit chil qui sont chi,
fait keus, boin gré vous en saront,
que volentiers l'escouteront;
ne n'en faites or riens pour moi,
mais, foi que vous devés le roi,
le vostre seigneur et le mien,
quemandés li, si ferés bien.
-cologrenant, fait le royne,
ne vous chaille de la haine
monseigneur keu, le seneschal;
coustumiers est de dire mal,
si qu'on ne l'en puet chastier.
quemander vous seul et proier
que ja n'en aiés au cuer ire, ne pour lui ne laissiés a dire
chose qui faiche a oir.
se de m'amor volés joir, si commenchiés tout de rechief.
-chertes, dame, che m'est mout grief
que vous me demandés a faire.
ains me laissaisse.i. des iex traire
que hui mais nule riens contaisse,
se courouchier ne vous doutaisse;
mais je ferai che qu'i vous siet,
comment que la chose me griet.
puis qu'i vous plaist, or entendés!